A cu nasciu aieri

cu l’occhi sinceri, ‘ncantàti

chi ti ffacci comu  ‘u suli

‘ntà ‘stu mùnnu chinu ‘i ṣṭṛati;

chi  ‘a matìna, quannu nèsci,

vidi tanti cosi beḍḍṛi,

e ti sònni ‘ddivintàri

un grann’essiri ‘mportanti …

Quantu vòti t’ha vutàri

a circari un veru amico,

quantu vòti  ha ‘ncuntràri

lu sapuri di lu sali …

e ha scanzàri tutti i pètri,

pi’ nun rùmpiri li pèdi,

e ha canciàri prestu ṣṭṛàta,

prima chi lu scùru vèni …

T’ha ‘nsignàri troppu prèstu

a guardarti di la ggenti,

a sapiri sòccu vòli,

a capiri la so’ menti,

pi’ putìri jiri avanti

senza essiri diṣṭṛuttu,

e pi’ crisciri cchiù grànni,

divintàri un òmu adultu.

E si sulu o ‘ccumpagnàtu

a scanzàri tu rinèsci

li periculi du’ mùnnu

chi ti pòrtinu chiù ‘nfùnnu:

droga, porno, delinquenza,

fàusu, furtu cu ‘a violenza,

e ‘u disprezzu di la vita

sia di’ vecchi chi di’ nichi …

Si rinèsci a sopraffari

chiddri chi, ormài ‘nsignàti,

da’ cusciènza tòa sincera

sànnu còmu approfittàri …

e poi vinci ‘u desidèriu

di campàri comu vònnu

chiddri chi ti vènnu a vìnniri

idee pronte e sòccu fannu …

Po’ pinsàri veramènti

chi vincisti la battaglia,

chi riguarda la to’ mènti

e la vita chi pussèdi,

e capisci, finalmenti,

chi mai nùḍḍṛu àvi ‘u potèri

di canciàri ‘i to’ pinsèri …

e stutàri a fantasia

da’ to’ anima d’aièri!