Isula Luntana

Pantiscu, vàsciu-vàsciu tu, partisti
cu ‘na valiçia china di spiranza,
e quannu, a chiddri tempi, ti nni isti,
‘nun’avivi pi’ inchiti la pànza.

Cu un vasùni a tò matri salutasti
E cu ‘stu dittu tu la cunurtàsti:
“Mamà, jèu mi nni vàiu a travagghiàri,
ma ‘spettimi … chi ccà vògghiu turnàri|”

Lu Reggimi ddugàva quasi a nenti
li tirrena di l’àutru Cuntinenti;
e a Tunisia gudìu du’ tò sudùri,
du’ tò travàgghiu e du’ picciòttu ardùri.

Dòppu tant’anni chi divintàu “Reggina”
di la vigna, e la jinchisti di jardina,
chiddru paisi ‘stràniu e senza amùri,
rivòsi lu sò sòlu e lu so suli! …

Facisti la valiçia e così sia
E turnasti a la tò Pantiddrarìa!

Ora nun si tu cchiù ‘u picciuttèddru
Ch’era si ‘nnìu un jiòrnu puvirèddru;
ora lu sordiccèddru lu façisti,
ma pi’ campàri ccà nun ti sirvìsti!

Tò matri, ormài, ‘un c’è cchiù …
E chisti mura, chistu locu, ‘stu scèkku, ‘sta natura,
su troppu stritti, troppu duri e lenti,
pi cu vìtti luntàni cuntinenti.

Cussì, lassàsti ‘u lòcu e lu jardìnu
pi’ travagghiàri ddrà l’Agru Pontinu;
di la tò arti jinchisti chiddra terra
e ddrà ti sistimasti ‘npaci e ‘nguerra.

Cuminciàsti di nòvu, e còmu artista,
cu occhiu, tu garmàsti a prima vista,
chiddra cuntràta ‘i fangu e senza nenti
cu jiardina, cu casi e cu sarmènti.

Lu mùnnu tu firrìasti, e d’unni jisti,
travàgghiu e serietà sempri purtasti!
Ma passa ‘u tempu, e ‘nfunnu a lu to’ còri,
un scordi ‘u to’ paìsi e lu tò mari …

E a li to’ figghi, chi senza chiù un minutu,
nun sannu la tò Storia e ‘u to’ passàtu,
pallànnu da’ vicchiaia chi ‘rrivàu,
ripeti chi vo’ iri a lu “dammùsu”,

pirkì è lu mègghiu postu pi ‘u ripòsu …