video

Quannu ‘u fòcu chi lu suli
porta a spassu mènzu ‘i ṣṭṛati
si ritira e pianu, pianu
dùna càudu di menu,
e li notti su’ cchiù longhi
e diventinu cchiù friḍḍṛi,

s’avviçina lu mumentu
di pinsari a li famigghi …
e turnàri tutti assèmi
a passàri li nuttàti,
pi divèrtisi a jukàri
e a garmàri tavulati.

Quantu còsi chi si ponnu
priparari pa’ manciàta …
e lu çiàuru già ‘ntònta
tutta ‘a ggenti di la ṣṭṛata,
chi, passannu, puru a distanza
senti dòliri la panza.

Raviulèḍḍṛi, spinci fritti,
ficu a ‘u furnu cu l’addàuru,
squadatèḍḍṛi duçi e amàri
cu ‘i cassàti di ricotta,
pasticciòtti a ‘u furnu cotti
chini di la marmellata,

mustazzola ricamati
cu lu mèli già ‘mpastati,
e li mènnuli caliàti
‘nzèmmula a li caccavii,
fannu cu la passulàta
un profumu ‘i malvasìi! …

Sunnu ‘u duçi di ‘sta ggenti
e nun menu è lu salatu;
cu la bèḍḍṛa tummiçèddra
chi a manciàlla, pari squàgghia,
cu li chiappiri ‘nzalàta
dinṭṛa ‘a ghiòtta mmisculìati,

lu viscòttu scuru, scuru
ccumpagnàtu cu ‘u furmagghiu …
e l’origànu d’’u vòscu
c’àvi un çiàuru diversu
e chi misu ‘ntà l’ammògghiu
inchi tuttu l’univèrsu.

E lu vinu di Zibibbu,
forti, ma di gran sapùri,
cu ‘u moscàtu profumatu
di li pàssuli e d’u suli,
fannu ‘a tavula chi c’è
digna propriu di lu Re.

Mentri manciu’sti delizie,
raccumannu a ‘u me’ viçinu,
– ‘sti cusuzzi nun ijttàri
fòra di lu to’ jardinu,
nun canciàri ‘sti sapùra
cu ‘i vilèna di ‘sti tempi –

Pirchì ‘nfunnu a tutti ‘i cosi,
quannu tu ti senti persu,
e a tantùni va çircannu
dintra ‘i tia ‘u veru versu,
iḍḍṛi suli pònnu dirti
còmu fari pi’ ‘nsirtàri
‘a ṣṭṛatuzza du curaggiu
chi ti fa ricuminciàri

Leggila in Italiano

 

 

Altre Poesie

Ti potrebbero interessare ...

ISCRIVITI ALLA NEWSLETTER

    2 pensieri su “Manciunarii

    Lascia un commento

    Il tuo indirizzo email non sarà pubblicato. I campi obbligatori sono contrassegnati *