Çiuçiuliati

– Sintisti soccu fici Marittina??!?? –

– Matri mia, ma chi testa … ‘ddra mischina! …
Tu pensa chi l’eppiru a truvari,
mentri tintava d’invilinarisi … –

– ‘Ncunscenza, una picciotta a chiddra età,
persi la testa appressu a chiddru ddrà! … –

– S’era me’ figghia l’avissi scusciata!
Nun putìa fari di peggiu, ‘a scillirata! –

– Menu mali chi ‘ntempu la truvàru
E subbitu a ‘u spitàli la purtàru! –

– E ora comu va?! –

– Ma, stamatìna mi dissiru ch’è mègghiu,
almenu pari …  Povira picciuttèddra …
màncu sapi quantu di peggiu c’è ‘nta lu campàri! –

– Su’ picciotti d’ora, chi vo’ fari!
hannu a crisciri pì potìsi ‘nsignari.
Si avissiru campatu a ‘i nostri tempi! –

– Ah, chisti cosi ‘un succidìnnu certamènti,
avìmmu assai chiù sali dintra ‘a testa! … –

– Si, ora è diversu, … ma ti rammènti
di quannu ‘un jornu fuìu Rusineddra
cu chiddru chitarrista maritàtu,
senza dinari e malu cumminàtu?! –

– Ah, mi sovvèni, ma fu un puru casu:
Iddru si ‘nnamuràu di Rusinèddra,
mentri sunàva pi lu San Juseppi,
guardannùla, pirchì era accussì beddra! …

Lassa stàri ‘i biddrizzi di una vòta! –

– Certu, certu, èrnu tutta nàutra cosa …
ma la vita, vòta, gira, gira e vòta,
pari chi ‘nfunnu ‘nfunnu si ripeti …
e tuttu chiddru chi ora si senti
nenti di novu dici a cu campàu,
e ‘ntisi tutti i chiacchiri d’a genti
e di so’ çiuçiuliàti si saziàu! –